Arranca Culturgal, onde «Galicia presenta toda a súa potencia creativa»

O filme «Ons» inaugurou onte a feira das industrias culturais galegas


Pontevedra / La voz

Coa proxección de Ons, de Alfonso Zarauza, que estivo precedida dun pequeno concerto de Chicharrón, trío carballés que fixo a banda sonora do filme, este venres levantouse o telón da Culturgal no Pazo da Cultura de Pontevedra. «En tempos de crise, as persoas precisamos a Cultura máis ca nunca». Facendo súa unha sentenza da Unesco, o alcalde Miguel Anxo Fernández Lores sintetizou o espírito desta feira das industrias culturais galegas, ao tempo que rememorou como a cultura galega «ten demostrado a súa capacidade de resistencia, sobrevivindo mesmo aos períodos máis escuros e sombríos da nosa historia».

Ao longo de toda a fin de semana, e atendendo ás restricións sanitarias derivadas da pandemia do coronavirus, están programados máis de setenta eventos, dende presentacións literarias, espectáculos en directo, coloquios e mesas redondas... A fin de contas, e tal e como sinalou o conselleiro de Cultura, Román Rodríguez, «sen dúbida, é a principal feira de referencia, evento de referencia, no ámbito cultural. Onde Galicia demostra con toda a súa forza toda a súa potencia creativa».

Deste xeito, a Xunta de Galicia mantén o seu apoio económico ao encontro, do que é a principal patrocinadora, pero, dalgunha maneira, tamén se involucra directamente na configuración do programa ao estar presente cunha véntena de actividades culturais. Ao longo destes tres días, a Culturgal será o escenario para seis espectáculos ao vivo do Fondo de Proxectos Culturais Xacobeo 2021, entre os que se atopan os concertos de Susana Seivane e de Luar na Lubre, pero tamén impulsa a proxección da restauración da versión polícroma do documental de 1927 Pontevedra, cuna de Colón, ou a presentación de diferentes iniciativas autonómicas no ámbito da cultura dixital, da promoción da economía social, da dinamización lingüística ou da programación cultural.

Vinte horas de retransmisión

Baixo o lema En caso de emerxencia, cultura e dada a situación sanitaria derivada do covid-19, o único espazo exclusivamente presencial é o adicado ás exhibicións cinematográficas con catro longametraxes de ficción e dous documentais, mentres que o resto, se ben terán un aforo limitado, emitiranse tamén en directo a través da web do propio Culturgal ou dos tres canais de YouTube habilitados: Foro, Libro e Escena. «Doce cámaras, vinte horas de retransmisión e un equipo de máis de sesenta persoas traballando para levar ás casas o mellor da cultura galega», destacaron dende a organización na presentación desta cita anual.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Arranca Culturgal, onde «Galicia presenta toda a súa potencia creativa»