CAPITAL E TAL | O |
31 jul 2006 . Actualizado a las 07:00 h.RETORNADO á cidade do Lérez, me contan os xornais atrasados que apareceron un día Alberto Núñez e Rafael Louzán, tal Ramón Calderón e Mijatovic, presentando a fichaxe estrela para a vindeira tempada electoral: Don Telmo Martín. A nova, pese á peculiaridade e boa planta da personaxe, en nada ten que sorprender ós pontevedreses de a pé, alá cada partido co menú que nos presentan, se cadra nin a Teresa Pedrosa lle tivo que sorprender tanto. Sen embargo, o sorprendente e estridente da nova nova foi a resposta do alcalde. O mandatario local chegou a decir algo así como que non é bo poñer ó raposo a coidar as galiñas, por aquelo da profesión de constructor do alcaldable. O efecto que pretendía o PP estaba consumado, Lores e o BNG puxéronse nerviosos na época que non toca. O feito de negarlle ou por en duda o dereito dun cidadán a representar ó seu pobo polo mero feito da profesión que ten semella ser bastante pouco democrático, con todas as suspicacias do mundo que se poidan sacar, sobre todo tendo en conta que na elaboración dun Plan Xeral de Ordenación non son poucas as cautelas previstas pola lei para evitar posibles irregularidades. Outra cousa sería demandar mais cautelas e normas mais rigurosas na ordenación urbana dos concellos. Pontevedra ten amosado madurez democrática pasando por cambios de goberno sen ningún tipo de trauma, coma ben saben Lores e o BNG, polo que parece ata ousado o feito de atacar a rivais políticos con estas mañas, no canto de defender boa xestión, sobor de todo por aquelo de que non queda aínda claro que os pontevedreses vexan con bos ollos a Telmo coma alcalde de Pontevedra. De Sanxenxo si -so faltaría-, ou ó mesmísimo Lores se ousa a explicarlle dentro dun ano ós pontevedreses as ideas do BNG, e por ende as súas, sobre a soberanía e autodeterminación de Galicia.