NA ÚLTIMA | O |
19 dic 2003 . Actualizado a las 06:00 h.A discreción é unha desas cualidades que se teñen xeralmente por boas. Ocorre o mesmo coa modestia, pois soen ir ambas unidas a humildade e non poucas veces ser sinónimas tamén de xenerosidade. Foi o que sucedeu en Cataluña con ese señor que deixou escrito que todo canto tiña fora para a Generalitat unha vez que el morrera. A única condición que puxo foi que se empregaran os cartos para ensinarlles inglés os rapaces da súa vila. Agora, despois de anos de investigación, comprobouse que os cartos doados son algo así como 31 millóns de euros. Parece ser que por producto dos rendementos bancarios que lle produciu o ingreso en entidades estadounidenses do obtido pola venta dunhas terras que tiña en Venezuela e baixo as cales había petróleo. Polo visto a teima de ensinar inglés víñalle o filántropo de non ser capaz el de aprendelo. Quizá foi esa incapacidade a que non lle permitiu comprender realmente a canto ascendía o que tiña nos bancos dos Estados Unidos. Porque en Cataluña vivía de prestado na casa da súa compañeira, sen grandes luxos nin ostentación algunha. Permitíndose o único luxo de soñar cuns rapaces que falen inglés á perfección, aínda que só sexa para dicirlle gracias no idioma que el non aprendeu.