O PSOE de Rairiz quere impulsar a petición do Día das Letras para Tovar cun premio de poesía

O pleno debatirá a proposta hoxe


ourense / la voz

O pleno de Rairiz de Veiga debaterá hoxe (13.00 horas) unha iniciativa do grupo de goberno para reclamar o Día das Letras para o poeta Antón Tovar, nacido no pobo de Pereira. É unha proposta que sairá adiante previsiblemente por unanimidade, toda vez que o PSOE tamén está de acordo coa iniciativa. Comparte a proposta, pero quérea facer máis ambiciosa. Por iso Pablo Lorenzo presentará unha emenda co obxectivo de buscar o apoio doutras administracións para impulsar a figura do poeta.

«Imos propoñer instar á Xunta a financiar un proxecto de casa museo na vivenda natal de Tovar», avanzaba Lorenzo. Dicía que falou co tema con familiares do poeta e acolleron con gusto a iniciativa. Actualmente a vivenda, situada no pobo de Pereira, pertence a un irmá de Tovar. A proposta inclúe tamén pedirlle á Deputación que cree un premio escolar de poesía co nome do poeta. A iniciativa xa existiu en tempos, pero fíxose a nivel local e durou «un ano ou dous», di Lorenzo. O PSOE quere recuperala e ademais buscar nela o pulo da administración provincial para facer chegar a convocatoria a todos os colexios ourensáns. A entrega dos premios faríase, segundo a proposta que defende Lorenzo, no transcurso da feira que cada verán se organiza no pobo de Pereira.

A petición das Letras para Tovar tamén será debatida nun próximo pleno en Xinzo de Limia, unha vez se celebre o pleno de elección do novo alcalde tras a dimisión de Antonio Pérez.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

O PSOE de Rairiz quere impulsar a petición do Día das Letras para Tovar cun premio de poesía