O médico pegado á terra en Castrelo de Miño

Obituario de Luis Figueiredo Godoy


Os veciños de Castrelo de Miño despiden hoxe a Luis Figueiredo Godoy, un veciño que non perdeu nunca o cordón umbilical coa súa terra e a dos seus antergos. O doutor Luís, como lle chamaban os habitantes da localidade de Pazo, onde tiña a súa casa, criouse fora de Castrelo, en Santiago. Na capital compostelá, onde seus país marcharon e montaron unha taberna, estudou medicina e alí empezou tamén a forxarse nun fondo sentir galeguista e unha preocupación pola realidade social do pobo que o marcaría para sempre. Ese apego a realidade e a terra levouno a manter sempre viva a relación con Castrelo de Miño. Pese a que exerceu a maior parte da súa traxectoria profesional no Hospital Xeral de Vigo -era cirurxián especialista en uroloxía-, Luis Figueiredo era un veciño máis no pobo; e nel estaba practicamente a cotío. Home afable e de trato sinxelo, contan os que o coñeceron, ese compromiso levouno tamén á esfera política, aínda que sen aspiracións a dedicarse integramente a ela, xa que a medicina era a súa vocación. No ano 1995 estivo na creación da agrupación local do BNG neste concello de O Ribeiro e formou parte da primeira lista que presentou a formación nacionalista no municipio. Unha participación que repetiu na candidatura do 2007 que encabezaba o hoxe alcalde Xurxo Rodríguez. Hoxe todos os que o coñeceron estarán acompañando a súa dona e fillas, xunto co resto da familia, na cerimonia de funeral que se celebrará as 18.00 horas na igrexa parroquial de Santa María de Castrelo para darlle o seu último adeus.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O médico pegado á terra en Castrelo de Miño