A Deputación editará unha publicación cos tres volumes da revista
27 feb 2024 . Actualizado a las 10:12 h.«Raigame. Revista de arte, cultura e tradicións populares» • Centro de cultura popular Xaquín Lorenzo • Deputación de Ourense • A publicación «Raigame» editou o número 47, volume co que completa o ciclo de tres revistas centradas na arqueoloxía da provincia de Ourense. Foi presentado nun acto no que participaron Rosendo Fernández, en representación da Deputación; Xulio Fernández Senra, do Centro Xaquín Lorenzo; e Antonio Rodríguez Colmenero, catedrático emérito da Universidade de Santiago.
Rosendo Fernández salientou a importancia do traballo desenvolvido nestas entregas e avanzou que a Deputación publicará nun só volume os tres exemplares. Logo da presentación da obra desenvolveuse unha mesa redonda, baixo o título «A arqueoloxía na provincia de Ourense. Situación actual e perspectiva de futuro», na que participaron Martiño X. Vázquez, Antonio Rodríguez Colmenero, Manuel García Valdeiras, José María Eguileta e Adolfo Fernández. No último número de «Raigame» inclúense traballos sobre o megalitismo en Ourense, as minas de estaño de As Muradelas (Baltar), o xacemento de Muro de Búbal (Monterrei-Oímbra), o Castro de Trelle e os gravados rupestres prehistóricos, entre outros contidos.