A prevención é a clave
OURENSE
Cando se fala de acoso escolar aínda se pensa, en ocasións, que se trata dunha situación de conflito que afecta en exclusiva aos centros educativos, pero isto non é certo; as consecuencias do acoso escolar traspasan as paredes da escola afectando á familia. É unha conduta que en certos ámbitos está normalizada, véndose como se fose «unha cousa de nenos»; mais, realmente trátase dunha situación que en casos extremos acaba de forma tráxica. Coñécense casos de acoso nos que a vítima ten que deixar a escola para poder recuperarse e os agresores son sancionados, pero parece que non é suficiente con eso. Contamos xa cunha regulación normativa na que se recollen protocolos de actuación no caso de detectar acoso escolar. Pero sigue faltando prevención. A sociedade actual está máis sensibilizada, probablemente debido ás noticias dramáticas que de vez en cando nos encollen o corazón. Aínda así non se ten asumido realmente o que sucede e quen intervén nunha situación de acoso escolar. Durante os últimos anos desenvolvemos en APES accións encamiñadas a comprender que está pasando; e sorprendeunos detectar que as familias nunca se imaxinarían que o seu fillo ou filla teña o papel de agresor ou que os docentes non contan con formación suficiente para detectar ou atender casos.
Por esta razón entendemos a prevención como a clave para evitar o acoso escolar. En APES colaboramos con centros escolares interesados en atopar medidas alternativas para facerlle fronte a este problema. Deseñamos proxectos que duran o curso enteiro coa implicación de docentes e alumnado sendo os nenos e nenas os protagonistas de campañas de sensibilización. Así, mentres toman conciencia, adquiren formación e difunden o coñecemento dentro do propio centro e fóra. Buscamos, en definitiva, estratexias de cambio que van máis aló do ámbito educativo, fomentando a empatía dos nenos e nenas para que sexan persoas máis comprometidas e responsables nun futuro.
Raquel Crespo é presidenta da Asociación para a Prevención da Exclusión Social (APES)