Dorrío anda en xuízos porque meses despois de gañar un certame déronlle as precarias condicións do premio
25 ago 2010 . Actualizado a las 02:00 h.Xosé Antón ten claro que foi obxecto dunha estafa por Telefónica ao dicirlle, meses despois, que o premio dun concurso de blogs que gañou era de tres meses e por 400 euros ao mes.
-¿Que é o que pasou?
-Pois que fai catro anos Terra Networks convocou un concurso de blogs ofrecendo un contrato de traballo á persoa que ganase ao ter máis visitas. Eu mandeilles un correo para que me detallaran as condicións dese contrato en caso de gañar. Nunca contestaron.
-¿Que ofertaban?
-Formar parte da plantilla de blogueiros da empresa convocante, empresa que durante o concurso foi absorbida por Telefónica e esta, polo que se ve, tiña outras ideas.
-E vostede gañou
-Pois si porque o meu blog foi o que máis visitas obtivo. Era un concurso de posicionamento. Eu sabía facer moi ben iso de buscar visitas e como teño moito tempo libre, dediqueime a elo e gañei o concurso.
-Unha vez que gaña, ¿que aconteceu?
-O concurso acabou un 10 de xullo e en todo o verán non recibín nin unha sola chamada nin un só correo electrónico. Á volta do verán mandei correos ás direccións que tiña da convocatoria do concurso e despois de moito insistir respostaron logo de tres meses e dixéronme que o premio era un contrato mercantil polo que como moito gañaría 400 euros máis IVE e tiña que pagar como autónomo, luz e todo eu. E por riba era un contrato de tres meses.
-¿Que fixo vostede?
-Fun a Consumo pero Telefónica nunca se presentou. Dábame a razón pero non ten xurisdición de emprego. Fun ao Xulgado do Social número 2 de Ourense. A Audiencia anulou a decisión.
-¿Que pasou alí?
-No primeiro xuízo Telefónica non se presentou. A xuíza aprazou o xuízo para setembro. A empresa si se presentou entón e pediu a incompetencia do tribunal dicindo que non lle correspondía xulgar iso. Non aporta proba algunha. A xuíza sentencia dándolle a razón á empresa a pesares de ter o informe do fiscal dicíndolle que ela é competente para xulgar este caso. Pero ela dixo que non. Tardou en sentenciar catro meses cando o Ministerio Fiscal respostou en catro días.
-Cal foi o seguinte paso?
-Fun ao Tribunal Superior de Xustiza de Galicia, que anulou a sentenza da xuíza e obrígaa a celebrar o xuízo. Isto foi en febreiro pasado e á espera estou de que isto sexa así
-Despois de este percorrido xudicial, ¿como se sente?
-Estafado. Eu agora estou no paro e podía estar traballando en Telefónica desde hai catro anos cun contrato fixo e remunerado. De estar no paro a estar traballando alá hai diferenza.