Ana Garza, a concelleira responsable da feira da cidade, asegurou que ante o malestar dos feirantes, a semana que vén os reunirá e tomará a decisión definitiva sobre onde se ubicarán. Sostén que na actualidade o goberno local ten tres opcións estudadas. Sobre as protestas dos veciños do parque Barbaña, di que as entende, pero que a cidade carece de espazos para realizar este tipo de eventos e que hai que buscar unha solución provisional.
-¿Como valora as críticas dos taberneiros sobre a idea de levar a feira ao Barbaña?
-O certo é que levamos dous ou tres meses negociando con eles e nunca tivemos ningunha queixa, polo que nos sorprende que agora se opoñan. En principio non puxeron ningún problema, pero ante este rexeitamento estudaremos tres opcións e a semana que vén decidiremos cal é a definitiva.
-Tamén falan de improvisación.
- O problema xurde porque nesta cidade se fixo un plan xeral de urbanismo no que nunca se buscou un espazo para este tipo de eventos.
-Tamén poñen en dúbida que haxa as infraestructuras necesarias.
-Ese non é un problema, porque o que son os baños se van a instalar de quita e pon, e no que se refire á electricidade se conectará á rede xeneral. Tamén temos falado xa cos servizos municipais de limpeza para tomar as medidas hixiénicas necesarias.
-Aos veciños da zona tampouco lles gusta esta posibilidade.
-Cos veciños se falou nada máis reunir aos feirantes. Sempre se lles dixo que era unha posibilidade, e que se ía a tratar de que o impacto fose o mínimo posible. Sei que eles non están a favor e entendo a súa posición.
-¿Entón está desbotada a alternativa do parque Barbaña?
-Non che quero dar esa noticia. A semana que vén tomarei a decisión, direi cal é, e punto.
-Os taberneiros optaban por seguir no entorno do actual campo da feira.
-Nese sitio non é posible. Os camións de obra van a ocupar a zona. Ademais tamén se vai a adecentar a parte superior do campo da feira. Hai unhas normas de seguridade que fan que sexa inviable que metamos os camións da feira mezclados cos da obra.