DIARIO DE AURIA | O |
05 nov 2004 . Actualizado a las 06:00 h.ENTRE os columnistas hai costumes que acaban por converterse en norma. Pásalle a Manuel Vicent coas festas de San Isidro en Madrid: amplos sectores antitaurinos agardan a columna que Vicent dedica, cada primavera, á festa nacional (¡ooolé!). Aquí non temos touros, pero temos festival de cine (¡ooolé!). De postín, evidentemente. Eu, mentres se sigan enviando invitacións nas que se solicita que os invitados asistan ao evento vestidos de etiqueta (¿Fernando Léon vestía de etiqueta?), escribirei cada San Martiño a columna de rigor. Porque a esta alturas parece provinciana e cateta esta invitación repetida. Porque o festival precisa proxección internacional, e nacional, e non glamour de segunda fila. Porque o Ourense que defendo (e creo que defenden as institucións) nada ten que ver con etiquetas no vestir, senón con outros tipo de etiquetas, marcas de identidade (Culturauria, Provincia de Cultura, Cidade de Luces,...), para vender o noso grande e único patrimonio, crecer, evolucionar, progresar. Polo demais, espero, que non olviden este ano a alfombra vermella, os fachos acendidos e, se me apuran, uns centurións romanos anunciando horarios e películas. Y las chicas con mantilla española. Será como en Los Toros: ¡ooolé!