Reparo en que os dous teñen fillas, pero nin sequera ese feito foi quen de frealos para repartirse mulleres. Do mesmo xeito que a cativada á porta do colexio intercambia cromos, Koldo e Ábalos debatían con que muller ía estar cada un deles. A un gustáballe unha, pero igual quería probar algo novo. Cambiamos? Mentres, o partido que dicían representar puxaba por alzarse coa voz máis autorizada do feminismo. Incongruencias!
Traficar con mulleres é noxento, peor incluso ca defraudar e roubarme. Porque si, eses sobrecustos das obras que son para o seu peto págollelo eu, e tamén vostede, que me está a ler, e todos os que cumprimos cos impostos que nos corresponden. E ben sei tamén que este é un vicio secular ao que poñerlle freo é tremendamente complicado, pero, mentres non me dean exemplo castigando e facéndose corresponsables dos seus máis altos (e baixos) cargos, comigo non conten. Se eu fose filla dalgún destes que violan ou menosprezan as mulleres, pediría que lle retirasen o título de pai. Os feitos son intolerables e o sistema político está cada vez máis podre. Debera darlles vergonza que os pobres lles financiemos calquera dos seus vicios, en especial estes. E dá igual que reclame aquí o que me deben. Pero, se poden, polo menos devolvan algo de dignidade á sociedade, pois non merecemos tal aldraxe.