En Huétor Tájar, un pobo pequeno da provincia de Granada, ocorreu un crime espantoso: un avó asasinou aos seus dous netos, de dez e doce anos, antes de suicidarse. O feito tiña antecedentes dolorosos. O home que matou os seus netos conducía o coche que sufriu un accidente no que faleceron a súa muller e a súa filla. El sentíase culpable, e a partir dese momento deu mostras dunha conduta anormal que culminou pechándose na casa cos seus netos, provisto dunha escopeta coa que disparaba a quen tentaba achegarse, entre outros, ao pai dos nenos.
A mañá do día 21 de maio, eu acendín un aparato de televisión que teño na cociña coa intención de ver as noticias mentres almorzaba. O que vin durante máis dunha hora foi información sobre o asasinato dos nenos, contado con todo luxo de detalles. Quiteille o son porque non me gusta ver penas que non podo remediar, e funme a facer tarefas de limpeza pola casa. De cando en vez, miraba o televisor para ver se cambiaran de noticia, pero non o fixeron. Así souben que a un dos nenos disparoulle e ao outro asfixiouno; tamén dixeron que seguramente non puideron defenderse, e que tardaron en morrer...
Considero que é unha mala política informativa fomentar o gusto polo morboso nunha sociedade que por desgraza xa tende a iso. Teño observado que, cando hai un accidente na rúa, moitas persoas corren a velo, na súa maioría non para axudar, senón para gozar do espectáculo. Se a cadea de televisión emitía aquelas noticias é porque ten un público ao que lle gustan. Paréceme que é unha mala política informativa. Creo que só a educación poderá evitar esa compracencia no morboso, pero a curto prazo non lle vexo remedio.