Un día do ano 2002, Eduardo Madina, secretario xeral das Mocidades Socialistas do País Vasco, sufriu un atentado de ETA no que perdeu unha perna. O presidente José María Aznar visitouno no hospital e fíxolle unha promesa: «Te voy a regalar la paz en Euskadi». Non foi tarefa doada, porque ETA seguiu matando e o PP acusouno de traizoar as vítimas; pero o 20 de outubro de 2011, ETA deixou as armas. Ese día, Borja Sémper, deputado do PP no Parlamento Vasco, fíxolle unha pregunta a outro de Bildu: «Se onte me asasinase ETA, ti o xustificarías neste Parlamento. Hoxe xa non. Que cambiou de onte a hoxe?». Non importa a resposta do deputado de Bildu, o que si importan son as reflexións que dez anos despois fixeron xuntos Eduardo Madina e Borja Sémper sobre o cambio producido na sociedade vasca, no libro Todos los futuros perdidos.
A ningún lle gusta que o Goberno de España dependa dos votos de Bildu, pero non din nin pensan que Bildu é ETA, nin que non deba participar no xogo democrático. Saben que en Bildu hai persoas como os deputados Jon Iñarritu e Oskar Matute, e o alcalde de Pamplona, Joseba Asiron, que condenan a violencia de ETA; e que Bildu faino por oportunismo político cando é necesario, pero evítao sempre que pode e prefire rexeitala que condenala. Agora, o seu candidato nas eleccións vascas négase a cualificar de terrorista a banda armada, o Goberno chámalle covarde e o PP activa as armas de destrución mediática para acusar de cinismo ao Goberno e ao PSOE. E iso ten graza porque o cinismo, tecido con mentiras e desmemoria, degrada o discurso político de todos os partidos, especialmente o do PP.
Mal está que o candidato de Bildu chame a ETA «grupo armado, que afortunadamente ya no existe», pero peor é que Aznar o chamase «Movimiento Vasco de Liberación». Mal que en 13 anos de existencia as veces que Bildu condenou a violencia de ETA se conten cos dedos da man; pero igual de mal ou peor é que o PP tardase 25 en condenar o franquismo.
Eu lin as actas daquel 20 de novembro de 2002 e as palabras do portavoz do PP, Manuel Atencia Robledo, parecéronme sinceras, pero catro anos despois o PP capitaneado por Mayor Oreja rexeitou a condena da Eurocámara ao se cumprir 70 anos do golpe de Estado de Franco.
Eduardo Madina e Borja Sémper advirten aos partidos que usan o terrorismo como arma política de que iso non funciona nas urnas. Ben está esixir que os nenos aprendan na escola quen foi Miguel Ángel Blanco e o que significou a loita contra ETA; pero tamén teñen que ofrecer un proxecto político para os próximos anos. Bildu faino e sobe; o PP e o PSOE non, e baixan.