Un é o comportamento do actual Dalai Lama pedíndolle a un neno que lle chupe a lingua. O outro é o vídeo dunha parodia da Virxe do Rocío na que se queixa con palabras moi vulgares de non ter en moitos anos unha boa relación sexual, e proponse tela con calquera dos seus dous entrevistadores. Na parodia faise evidente algo que se adoita ocultar: algunhas formas de demencia, por exemplo a enfermidade de Pick, caracterízanse por perder a capacidade de asumir as convencións sociais e desenvolver un comportamento sexual inapropiado, con agresións a calquera persoa. As familias adoitan ocultar estes feitos, co cal é moi posible que sexan máis frecuentes do que admiten as estatísticas actuais.
O abate Pierre, chamado O anxo dos pobres, díxolle nunha ocasión a Juan Pablo II que, como bispo de Roma, debería xubilarse como todos os bispos. E lembroulle o final de Pío XII: «Foi un desastre para a Igrexa. O papa é un home que ten responsabilidades respecto do mundo enteiro. Non se pode deixar no posto a un home de oitenta ou noventa anos. Non é serio».
Benedicto XVI ( cardeal Ratzinger) dixo cando dimitiu como Papa: «Cheguei á certeza de que as miñas forzas, dada a miña avanzada idade, xa non se corresponden coas dun adecuado exercicio do ministerio petrino». Tiña 86 anos, retirouse e non protagonizou ningún escándalo que puidese prexudicar á Igrexa católica. Era intelixentísimo. O actual Dalai Lama, Tenzin Gyatso, décimo cuarto Dalai Lama, líder espiritual do Tíbet, líder relixioso da escola Gelug do budismo tibetano, ten 86 anos. Quizá o seu escandaloso xesto débase ao que sucede na enfermidade de Pick.
E o Papa Francisco ten tamén 86 anos. Estará a pensar en xubilarse?