Arredor do 5 de xaneiro


O pasado 5 de xaneiro conmemoramos sesenta anos da edición de Memorias dun neno labrego, título de referencia na literatura galega do pasado século, traducido total ou parcialmente a case vinte linguas, seguramente o libro máis veces reimpreso e reeditado das nosas letras, no que se iniciaron varias xeracións de lectores. Neira Vilas ten falado algunha vez de como empezou a escribilo, nun café de Buenos Aires, aproveitando as horas que lle deixaba libre a súa labor comercial nunha casa importadora de madeiras. Era un cafetería da rúa Cullen, no barrio de Villa Urquiza. Mentres escribía, o camareiro que lle servía os cafés, que seica era da provincia de Ourense, botaba olladas por riba das notas con tanta curiosidade que o autor decidiu deixarllas ler, acaso inseguro do texto. «Eu son Balbino. Un rapaz da aldea. Coma quen dis, un ninguén. E ademais, pobre». Segundo Neira Vilas, o camareiro lía e facía observacións que o autor consideraba. El foi o primeiro lector da novela.

 O libro publicouse o 5 de xaneiro, véspera de Reis. Quen primeiro se ofreceu como editor foi Luis Seoane, na editorial Citania, a mesma que publicara en 1959 A esmorga de Eduardo Blanco Amor. Pero Neira Vilas prefiríu a editorial Follas Novas, que uns anos antes Anisia Miranda e mais el botaran a andar, coa axuda de Elsa Fernández, para a difusión do libro galego en América. Outro día 5 de xaneiro, en 1950, morría Castelao na capital arxentina, poucos meses despois da chegada de Neira Vilas como emigrante a aquelas terras, en 1949. Moito impresionou ao de Gres o enterro de Castelao, con honores de xefe de estado.

O segundo editor das Memorias… foi Isaac Díaz Pardo, en Edicións do Castro (1968). Daquela comezou realmente a difusión da novela, apoiada na excelente acollida que dende o primeiro momento tivo no mundo escolar. Isaac finou noutro 5 de xaneiro, neste caso do 2012. El foi o primeiro grande editor de Neira Vilas, e mais o seu anfitrión en Galicia, que o recibía e atendía en Sargadelos, na residencia de Sada ou no Instituto Galego da Información de Santiago de Compostela, sempre acompañado de Anisia.

Outra data de referencia, que non quixera esquecer, é o 7 de xaneiro de 1913. Daquela nace en Lourenzá Francisco Fernández del Riego, persoeiro de referencia na traxectoria literaria de Neira Vilas, correspondente de Galaxia e do galeguismo dende o exilio interior á Galicia de Buenos Aires, liña directa con Luis Seoane. Del Riego mantivo sempre viva a relación con Neira Vilas a través tanto da editorial como da revista Grial. O sexto pesoeiro a non esquecer segue connosco, Xesús Alonso Montero, sen dúbida o principal estudoso e divulgador dos traballos de Neira Vila aquén e alén das nosas fronteiras, animador das súas traducións e da súa significación na historia da literatura galega contemporánea.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
9 votos
Comentarios

Arredor do 5 de xaneiro