O tenista Rafa Nadal acaba de agrandar a súa xa excelente traxectoria deportiva ao conseguir o seu título número 20 nun grand slam. Ninguén dubida das capacidades físicas do tenista español, pero se algo o caracteriza son as súas habilidades psicolóxicas. Unha desas habilidades máis identificadas por psicólogos e psicólogas e polo público en xeral é a súa fortaleza mental. Pero a que nos referimos cando falamos deste concepto? Desde a psicoloxía do deporte entendemos a fortaleza mental como un conxunto de habilidades como o compromiso, o reto, o control e a confianza. E é evidente que Rafa Nadal posúeas todas: compromiso porque é capaz de involucrarse ao máximo no que ten que facer; reto porque asume cada partido como unha oportunidade e non como unha ameaza; control xa que en cada punto, en cada xogo céntrase unicamente no que depende del, e finalmente confianza en si mesmo, o que lle permite non renderse e pelexar ata o punto máis adverso nun partido. A fortaleza mental é, por tanto, un aspecto psicolóxico que determina en gran medida o mantemento do rendemento deportivo.
É esa fortaleza mental a que lle permite alcanzar grandes obxectivos? Sen dúbida a resposta é un si rotundo, sen desprezar, loxicamente, a súa capacidade física e o seu traballo diario. Só así poderíamos explicar o seu grao de motivación ao longo de toda a súa carreira deportiva, unha carreira, por certo, na que o seu primeiro grand slam gañouno no 2005, e que visto o ocorrido este pasado fin de semana podería alongarse varios anos máis. Unha das cousas que máis chama a atención é precisamente que goce do mesmo xeito a súa primeira vitoria con apenas 19 anos a súa, ata o momento, última vitoria 15 anos despois. A motivación está presente en toda a súa carreira deportiva e é ese o combustible que lle permite marcarse novas metas. Os seus obxectivos son sempre difíciles, pero realistas e enfocados á tarefa máis que ao resultado final, dous das premisas para que o establecemento de obxectivos funcione como estratexia para manter a motivación e desenvolver a autoconfianza.
Poderíamos agora preguntarnos se esa fortaleza mental é innata ou aprendida. Parece lóxico pensar que a de Nadal é innata, pero esta pode adestrarse da mesma maneira que adestramos outras habilidades psicolóxicas. E este adestramento só pode ser realizado de maneira planificada e rigorosa desde a psicoloxía do deporte.