Con frecuencia aparecen nas redes noticias falsas sobre o covid-19. Refírense sobre todo á suposta orixe artificial do virus nun laboratorio chinés e aos terribles perigos para a saúde que se derivan do uso de máscaras. Eu acabo de recibir unha, asinada con nome e apelidos por un médico español xubilado, que dá información -comprobable na Internet- do seu currículo. Na súa mensaxe asegura que o covid non pode transmitirse a través do aire, e que nos envenenaremos co CO2 da nosa respiración.
Paréceme moi perigoso pola proximidade (médico español que dá a cara) e porque a idea de que a máscara prexudica a saúde está moi arraigada en moitas persoas. Nun momento en que numerosas comunidades impoñen o uso obrigatorio, paréceme útil reproducir o que dixo María Elisa Calle, experta en epidemioloxía e saúde pública e profesora da Facultade de Medicina da Universidad de Castilla-La Mancha: «O uso de máscaras non produce hipoxia [deficiencia de osíxeno no sangue]. Os tecidos utilizados deixan pasar o gas, e o osíxeno é un gas. Respiramos osíxeno mesturado con nitróxeno e expiramos CO2, que tamén é un gas. Unha máscara funciona filtrando partículas, non gases. Para iso fan falta dispositivos ou máscaras antigás, non máscaras».
No mes de abril Sanidade deu unhas recomendacións sobre o uso de máscaras onde falaba de riscos potenciais, que eran sobre todo a auto contaminación ao reutilizalas, e a falsa sensación de seguridade, en detrimento da distancia social e as medidas de hixiene. Tamén se mencionaban as dificultades para respirar. Co que hoxe se sabe sobre o virus, creo que é necesaria unha campaña informativa e saír ao paso desas mensaxes que aseguran que hai perigo grave para a saúde polo uso das máscaras.