Desconfinando a lingua


Noutras condicións, no 17 de maio dedicado a Ricardo Carvalho Calero participarían centros de ensino, institucións e todo o asociacionismo lingüístico e cultural galego, que tantos esforzos fixo para que por fin se lle dedicase o Día das Letras. Lembrarían e difundirían toda unha vida e obra dedicada a desconfinar o galego, como estudante no Seminario de Estudos Galegos, como primeiro catedrático de galego na USC ou como conferenciante en ducias de xornadas, como aquelas que -en 1986- deron lugar á constitución da Mesa pola Normalización Lingüística.

 

E a sociedade enchería, de novo, as rúas de Compostela, mostrando a súa vontade de avanzar na defensa do idioma, aínda sen o soporte das institucións, que, cando non se absteñen na tarefa de defender a nosa lingua, é para actuaren na súa contra.

Organismos internacionais como o Consello de Europa e mesmo a ONU, a través do seu relator especial para os dereitos das minorías, poñen en evidencia a emerxencia lingüística que padece a sociedade galega, e recórdanlle ao Estado e á Xunta que deben actuar para combatela. É obriga do Goberno galego pórse á fronte da normalización do noso idioma.

O galego leva moito tempo confinado. Demasiado. En espazos de uso reducidos, coa súa liberdade de circulación restrinxida, mesmo cando non precisa pasaporte para o relacionamento directo co resto de variantes do galego-portugués ao que pertence. Non falamos de concesións graciosas. Falamos dos dereitos e dos deberes correspondentes, de xustiza, de igualdade e da cohesión social, tan necesaria sempre, e máis en momentos coma o actual. A lingua galega é necesaria para mellorarmos colectivamente a nosa vida como pobo.

Ricardo Carvalho Calero mostrounos a posibilidade de rectificar a historia. Por iso, este 17 de maio sairemos ás nosas xanelas e varandas, tamén ás das redes sociais, para continuarmos a desconfinar a nosa lingua. Precisamos dela.

Por Marcos Maceira Presidente da Mesa pola Normalización Lingüística

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Desconfinando a lingua