Falemos de números. Do 100, do 1.000. Ollo ao que miden este días: centos de mortos, miles de infectados. Medran coas horas. Decenas de miles de persoas en control médico. Poboación de 11 millóns illada en Wuhan. Cincoenta e seis millóns de viaxes restrinxidas.
Son as cifras do virus da imprudencia.
Que fai o virus? O que faría calquera, intentar sobrevivir, buscar un hábitat que lle asegure a existencia. Dálles igual un animal ca un humano mentres conformen organismos vivos, xa que iso é o único que buscan.
Este virus, que pode ser letal, segue a esparexer o seu radio de acción, sen misericordia ningunha. Pero de onde saíu ese terror microscópico? Pois aínda están a indagar sobre a orixe, pero todo apunta a que partiu dalgún animal. Non un que estaba na súa contorna natural, non. Un animal nun mercado ilegal, onde se trafica con especies exóticas, sen medidas sanitarias nin sequera de salubridade. Ou sexa, un mercado da imprudencia, da cobiza, do nulo respecto pola fauna, nin polo desenvolvemento natural do mundo e da vida.
Agora que? O mundo ameazado. Agora levamos as mans á cabeza, claro. Pero a existencia deste mercado pseudo clandestino é ben coñecido. Pásase por algo porque a ambición, os cartos, acaban saltando as regras todas e incluso a conciencia. Ai, amigo... pero un día pasa algo coma isto, a humanidade séntese ameazada e choramos.
Pero, aprendemos? Ou imos seguir permitindo estas atrocidades? Logo de nada serve laiarse. Afastémonos da hipocrisía e actuemos con responsabilidade.