Seica temos que votar. Claro, porque non temos outra cousa que facer. Votar, aturar os insultos entre os partidos políticos, botarse a culpa continuamente uns aos outros, coller vacacións pagadas, seguir facendo que lles importamos e, ao final, volver votar.
Dáme igual o que digan uns e outros. Son todos responsables, conxuntamente, de volvernos mandar ás urnas. Entre todos non xuntan a suficiente responsabilidade política para achegar posturas e unirse en beneficio do país. Si, si. Cóntenme o que queiran, escúsense no que máis lles apeteza pero... tanto Xan coma Pericán. Uns polos outros e o país sen Goberno porque non hai acordo. E todos, iso si, xactándose de ser os máis democráticos e exemplo de corrección.
Non sería corrupción?
Saben que lles digo? Que se repetimos eleccións o único que merecen é que vaiamos votar exactamente os mesmos que fomos da outra vez, e repitamos todos o noso voto. Si. Darlles o mesmo resultado e obrigalos a entendérense, que para iso son políticos, ninguén os obrigou. Porque agora son eles os que nos obrigan a nós a facerlles o traballo e resolverlles o problema. E xa está ben.
Eu non elixín a política como profesión. Teño abondas cousas das que ocuparme como para perder o tempo nas súas disputas dialécticas e as súas loitas de poder e ego. Sinto lembrarlle que vostedes non están aquí para iso. Están para servir á sociedade. E non o están facendo. O embigo que teñen que mirar non é o propio, é o de todos os que agardamos que se poñan a traballar.