A historia repítese


O Boletín Oficial do Estado poucas veces emociona. Porén, hai uns días, a lectura dun simple listado de nomes publicado no BOE, sen máis retórica, emocionou a case todo o mundo. Aclaro: ese «case» refírese aos fascistas que aínda cren que os españois deportados ao campo de concentración de Mauthausen acabaron alí porque o merecían, pero a emoción compareceu en todo aquel que teña un mínimo coñecemento dos feitos históricos: milleiros de persoas que se refuxiaron en Francia no 39 foron abandonadas polo Estado español, que lles retirou a nacionalidade e pactou co Goberno colaboracionista a súa deportación á Alemaña nazi, para envialos a campos de exterminio como Mauthausen, Auschwitz ou Ravensbrück, como relata a galega Mercedes Núñez nos seus dous libros de memorias. Que se publiquen eses nomes no BOE implica que o Estado, por fin, asume a responsabilidade sobre a sorte desas persoas represaliadas durante corenta e dous anos máis trala morte do ditador.

Conta Paco Roca no seu cómic Los surcos del azar a historia dalgúns deses refuxiados que fuxiron nun barco, o Stanbruck, que rescatou a milleiros de republicanos e botou máis dun mes fronte ás costas do norte de África agardando un compromiso de seguridade para que esas persoas puideran baixar, en realidade, a un camiño de morte e tortura nos campos de Orán. Non fai falla botarlle imaxinación para albiscar o paralelismo con casos como o do Open Arms ou o Aquarius, barcos cheos de refuxiados de guerra que non poden pór os pés en terra porque a desmemoria e a ultradereita xa os condenaron. Son as rimas da Historia, causadas por unha Transición baseada no esquecemento en lugar da memoria, e nunha chea de mentiras.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
8 votos
Comentarios

A historia repítese