Un proxecto de país


Non se ve por ningures que algún político o teña. O que se ve, en canto ás tres dereitas, é que o único tema que con verdadeira teima manexan é o de Cataluña, mesturando allos con bugallos -nacionalismo e independentismo metido todo no mesmo saco- e artigo 155 indefinido. Todo un programa de proxecto de país.

 E a esquerda, ou o que por tal cousa se acostuma ter, non anda moi afastada da dereita, cando menos en canto a proxecto de país. E cando suxire, con moita cautela, algunha posibilidade, faino sen concretar medidas ou decisións que cómpre adoptar. Por exemplo, sabe alguén que queren dicir os que din que España é un Estado plurinacional, proposta que, sen máis explicacións, pouco ou nada nos ensina e nada nos suxire sobre o que por proxecto de país se entende?

Un proxecto de país ten por forza que ser ideado tendo moi presente que nel han caber todos, nacionalistas e non nacionalistas, sen exclusións, e que debe satisfacer as necesidades e aspiracións do conxunto da sociedade. Isto é xusto o que botamos en falta, do que está orfa a política española de hoxe, incluída a galega, perdida sempre en pequeneces.

Ben sei que moitos pensan que é imposible poñer en práctica ese proxecto (sen saber aínda en que consiste, por non habelo), porque pensan que os políticos que temos están mergullados noutras cousas máis inmediatas e máis pequenas e, tamén, que ese proxecto os excede. Mala cousa, se así fose.

Pero, aínda que así fose, polo menos haberá que intentalo dalgunha maneira, tratar de convencer á sociedade de que estamos nun ciclo esgotado, que ese proxecto nos comprende a todos, que non pode haber exclusións e que todas as forzas políticas o asuman. Máis ca un desiderátum pensamos que é unha necesidade. E moi urxente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
27 votos
Comentarios

Un proxecto de país