Carracedo


Son admiradora absoluta de Ángel Carracedo. Si, o xenetista máis brillante do noso país, un dos máis importantes no mundo. Seguro que todos os que coñecen a cantidade de premios e logros cos que ten feito do mundo un lugar moito mellor tamén o admiran. Pero eu quixera salientar aquí a miña homenaxe particular ao seu sorriso. Ese co que sempre recibe. Un sorriso cheo de modestia e tenrura, un sorriso natural e sincero, un sorriso humilde. A súa carta de presentación. Porque Carracedo é un home tranquilo, nada histriónico, sinxelo. Fala con igual devoción da investigación xenética que dos seus mergullos no mar. Cando fala da familia, desbórdao a mesma paixón.

O seu mundo científico ten límites razoables: o mar, o fogar, a lei. Unha mostra máis de absoluta congruencia. Defende que a humanidade ten que seguir sendo iso, humanidade. Fainos saber que a euxénese (modificación xenética para o perfeccionamento da raza) non é un xogo. Mantén o ton baixo e a calma nas palabras, pero é totalmente contundente. Impacta escoitar a alguén tan comedido coma el dicir que se este é o mundo ao que imos, apéase.

Difícil atopar xente así, con esa coherencia que esmaga. Está no alto da ciencia e vive na base da sociedade. Non podemos volver á selección da raza. Non podemos converternos nunha estrutura de xenes. Imos acabar por estar ao servizo da ciencia, e é esta quen ten que traballar para a humanidade.

Complicado ser eminencia e manter o norte. Que sinxelo parece con alguén como Ángel Carracedo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
45 votos
Comentarios

Carracedo