Solución: nacionalizar a AP-9


O 9 de Marzo o Goberno de Rajoy, ante unha proposta de En Marea no Congreso, dixo que a transferencia da AP-9 non era viable porque implicaba «compromisos de pagos que podían ascender a 8.870 millones». Sabiamos que era mentira, pero agora temos a proba da inaceptable falsidade do Goberno: unha empresa privada vai comprar o 56 % do grupo Itínere (propietario de Audasa, e polo tanto da AP-9) por 722 millóns. Un calculo fácil permite valorar o total do grupo Itínere en 1.300 millóns de euros. Se todo o grupo -que explota outras sete autopistas con máis de 650 quilómetros- vale 1.300 millóns, canto vale Audasa, que ten como propiedade exclusiva a explotación da AP-9?

 

É certo que a AP-9 é a máis rendible do grupo -grazas a que ten as peaxes máis caras de Europa-, pero os seus 219 km son apenas a terceira parte dos km de autopista que explota Itínere. Tendo en conta ambas as variables, o prezo de Audasa pódese estimar entre 650 e 700 millóns. Esta cifra veríase reducida de forma considerable se o comprador fose a Administración, porque o Ministerio de Fomento ten a obriga de pagar cada ano 7 millóns a Audasa para compensala pola eliminación das cabinas de peaxe no Burgo e en Rande. Nos trinta anos que restan de concesión o Estado vai ter que pagar 210 millóns, cifra que podería chegar ata 400 se prospera unha demanda de Audasa.

A transferencia da competencia á Xunta é unha demanda xusta e compartida polo conxunto da sociedade, pero, aínda exercendo a competencia con total decisión, non serviría para resolver o problema fundamental: as peaxes. Nin para baixalas e, moito menos, para eliminalas. Iso só é posible coa titularidade pública, nacionalizando Audasa para poñela ao servizo dos intereses do país e non dos fondos de investimento. Estamos no momento de facelo. Porque o Estado vén de gastar 3.500 millóns en rescatar as autopistas radiais. Porque nos próximos tres anos acaban as concesións das grandes autopistas en España, que pasarán a ser de titularidade pública, agás a AP-9, que seguirá sendo explotada por unha empresa privada ata 2048. Porque temos dereito a un trato igualitario co resto do Estado.

Por Manuel Lago Deputado de En Marea

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
22 votos
Comentarios

Solución: nacionalizar a AP-9