Volve a moda do fungo milagroso para todo


Cada certo tempo póñense de moda produtos cualificados de marabillosos ou de «súper alimentos» de procedencia exótica: as bagas de goji do Himalaia, a quinoa, o allo negro, as sementes de chía, a alga espirulina… Produtos que, segundo din algúns, alongan a vida, aumentan a enerxía de quen os consome e tamén a súa forza, borran as engurras, reducen de xeito considerable o colesterol, fan perder algo de peso, melloran a función sexual, resolven o insomnio, ademais de seren unha grande axuda contra o cancro, os problemas circulatorios e toda clase de males; ou sexa que, se fose certo todo iso, serían a panacea universal ou bálsamo de Fierabrás, que don Quixote coñece e proba con relativo éxito.

Así que a cousa vén de lonxe. Na miña infancia, o produto marabilloso chamábase «El hongo», sen máis. Unhas amigas de miña avoa tíñano e convidaban as súas amizades a unha copiña da auga que soltaba. Mantíñano a temperatura ambiente sobre un aparador, nunha xerra de cristal , flotando coma unha medusa marrón nunha auga amarelada, cuberto cun tapete de encaixe. Era algo repugnante.

Hai uns anos falouse moito do fungo Dictyophora, que tiña forma de falo, e cuxo cheiro, dicían, producía orgasmos nas mulleres, pero non chegou a comercializarse como afrodisíaco. O produto milagroso actual é outro fungo, o Reishi, de orixe chinesa. Anúnciase como o fungo da eterna mocidade e véndese en herboristerías, parafarmacias e tendas de produtos dietéticos en po e comprimidos. Xulgando polas fotos, eu xuraría que é o mesmo da miña infancia, que, sen xerra e sen tapete de gancho, mellorou moito. Nihil novum sub sole. Nada novo baixo o sol.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
31 votos
Comentarios

Volve a moda do fungo milagroso para todo