Carta a Rajoy e Mas


Benqueridos president(e)s: Escríbolles preocupadísima. É meterme na cama e pensar hora tras hora no que desvarían, así que boto a noite pensando cómo dicirlles que non saben o que é o dereito a decidir. «Non terán á man un dicionario, ou un asesor con acceso á Wikipedia», digo en alto, co que aumenta o meu insomnio e, por tanto, as posibilidades de me converter en psicópata, plantarme nun Parlament(o) e cometer algunha atrocidade que, sen dúbida, media España e media Cataluña aplaudirían simbolicamente cunha cadea humana de Irún a Gran Canaria, océano incluído. A miña preocupación, como dicía, ten que ver con vostedes, president(e)s, pois cren que o «dereito a decidir» é coma o dereito a opinar, a comer xamón, ou a mercar o libro da Esteban, entre outros dereitos chorras que non teñen nada que ver coa democracia. Porque nin o dereito a decidir é o mesmo que o dereito á autodeterminación, nin o Dereito (así) ou a Lei (asá) son inamovibles coma o teorema de Pitágoras. Autodeterminarse non é o mesmo que facer consultas como levan facéndose legalmente en centos de concellos españois desde 1978; e a Constitución xa se modificou un día, e aquí seguimos todos, basicamente igual. E xa que me atrevín a escribirlles, quixera dicir que, se fuchican na Constitución e van encher de contido iso do dereito a decidir, pois que tamén nos deixen ver se queremos unha monarquía ou unha república. Se gaña a primeira opción, malia non ser a miña, déixenme propor (pois semellan abertos a propostas deste tipo) que valoren deixarnos ser súbditos das súas maxestades os Magos de Oriente. E a Cataluña independente, tamén.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
19 votos

Carta a Rajoy e Mas