Hai que ter moito coidado co que nos prometen, sobre todo cando se fala das cousas mediante titulares, sen especificar a letra pequena. O presidente da Xunta comprometérase a promover unha nova lei para o emprego público. Escoitado así, parece unha idea marabillosa para todos. Pero? logo de ver as especificacións que se propuñan para a mesma, semella que vai ser moi beneficiosa tan só para uns poucos. ¡Vaia!
O Movemento pola Igualdade no Emprego Público (MIEP) comenta que esta norma o que promove é que se converta o persoal laboral fixo da Xunta en funcionarios, sen pasar polo tan temido (e necesario) exame das oposicións no seu intermedio.
Inxusto totalmente. Se por algo se ten que definir a Administración pública é, precisamente, por manter a igualdade de oportunidades para os cidadáns, función que cumprirían as oposicións. Se eliminamos estas? moi mal vai ir a cousa.
Defendo os funcionarios, os que cumpren o seu traballo con responsabilidade e dilixencia. Vin como moitos mestres e profesores se reciclaban, estudaban, asistían a cursos de formación para actualizarse e estar ao día continuamente. E pasar as horas da fin de semana preparando actividades. Valoro o esforzo e camiño que fixeron ata conseguir, merecidamente, o seu posto. Quizais por iso, eles tamén eran felices exercendo a súa profesión. Sen todo iso, perdería o seu valor, e o seu sentido.
Son tempos difíciles. Para todos. Repito. Para todos. Por iso as oportunidades tamén se lles deben ofrecer ás persoas por igual.