Escríbolles desde Rusia, onde cheguei na procura dun modelo de país para recomendar nesta columna aos que teñen que resolver España. Xa saben o que se di por aí: Rusia é un gran país porque non ten que lle andar pedindo esmola ao Banco Central Europeo, co seu rubliño devaluable ao libre albedrío de Vladimir Putin quen, como é sabido, é o mellor presidente do mundo; o máis votado desde logo... Seguro que a nós nos iría doutro xeito se Rajoy fose cinto negro de judo, excelente esquiador e exaxente do KGB. Con alguén así, os mercados habíano pensar antes de se pór a pedir, e Merkel pediría perdón por andar pensando de máis nos intereses do seu país en vez de velar polo noso.
Ser Rusia, si. E resolver coma ela o problema do paro: con crear o perfil laboral de vixiante de escaleira mecánica ou o de portador da máquina canceladora do bonobús, mesmo o de revisor dos revisores do trolebús, cobrando cadanseus 200 euros ao mes, converteríamonos neste marabilloso país sen paro. ¿Cren que eses cartos non abondan para vivir? Tranquis: basta con culpar á herdanza do pasado (socialista ou soviético) e convidalos a ser emprendedores, por exemplo mercando o Celta ao contado.
Si, señores, Rusia, que por non ser Europa é espello no que ollarse. Pero as galegas, coa nosa garantía de conservadorismo que é a morriña, sempre botaremos en falta o BCE que non devalúa así caia Francia, a prima de risco tradicional, a Merkel co seu bolso ateigado de bonos e o polbo á feira (en Rusia non hai feira desde o 17), porque no fondo sabemos que Europa é o berce das revolucións todas.