XOSÉ CARLOS CANEIRO
29 mar 2006 . Actualizado a las 07:00 h.ASÍ chamaban os romanos a este recanto, verdísimo, da Hispania: Fisterra. Era Galicia o lugar onde a terra terminaba. Cargamos durante séculos con lendas negras, tópicos inxustos, nubes no mapa e estradas que eran de segunda B (de primeira e segunda eran as do resto de España). Sufrimos os adxectivos dos escritores azorinistas, que sempre nos pintaban de gris morriña e melancolía. Vimos subir e baixar ao Celta e ao Deportivo. Cantamos as corenta aos gobernos e eles cantaban, para nós, a canción de nuncajamás. Sen embargo este é un país luminoso, pleno de talento. Talento. Parece que imos investir nel, ou no seu aliado: a intelixencia. O computador Finis Terrae , de Galicia, será o primeiro de Europa. Un prodixio para os científicos. Estas noticias son as que precisamos. Noticias que nos melloran e engrandecen. Palabras que un celebra brindando entre a chuvia, gozando, mirando o mar. Azul. Ou o ceo, azul. Ou os castelos de ilusión que reinan na alma, azuis. O azul é a cor desta terra porque é a cor de todos os principios. Galicia, que era a fin, quere e debe ser o initium . Investir en saber, talento, intelixencia, arte, investigación, luz, creatividade. Estamos condenados, por fin, á esperanza.