EN CERTA ocasión preguntáronlle a Albert Camus, sabendo que era ateo, que esperaba dos cristiáns. El respondeu que esperaba que fosen cristiáns. Só iso. E nada menos. O nomeamento de Ratzinger lembroume esa actitude de Camus. Sen dúbida porque me dá medo que poida ser pouco cristián. É contrario ao espírito cristián silenciar a quen non pensa coma un, perseguir sen piedade aos discrepantes, persistir con teima na inferioridade da muller, non condenar a tortura e aos gobernos que a practican, e outros abusos, ou non ter a piedade necesaria para comprender o que no mundo de hoxe significa a prevención da sida. Xa sei que así pensaba o inquisidor Ratzinger e que, ao mellor, o papa Benedicto XVI vai pensar e actuar doutra maneira. É importante, para crentes e non crentes, un Papa cristián, porque eses valores son indispensables no mundo de hoxe e que os exerza sen complexos quen ten a grande autoridade moral do Papa de Roma. Porque, infelizmente para uns e para outros, non sempre os católicos teñen sido cristiáns.