| O |
22 oct 2003 . Actualizado a las 07:00 h.Agora que gana a extrema dereita en Suíza e que en España vencen, venceron e vencerán os de sempre: abonados á victoria. Agora que en Vigo rompen, BNG e PSOE, como amantes de ocasión que nunca se amaron (¿non hai ninguén na esquerda que sexa sincero e se digne a pronunciar a gran verdade?: Socialistas e Nacionalistas, aquí, son contrarios). Agora que choven pedras en vez de chuvia, que as gatas non teñen gatos con quen compartir bicos e lúa, que as gaivotas esqueceron rir e a intelixencia deixou de ser intelixente. Agora vas ti, Manolo, e desapareces en Bangkok. Irás con ese conto por aí adiante, de incógnito, como Carvalho. Eu xa sabes que non o creo. Que os periódicos acostuman inventar noticias para encher planas e esta, que si, é a máis inaudita que teño lido ultimamente. Anda, Montalbán, deixa as bromas e pasa pronto polo país dos mil amores. Recítame versos no oído e perseguiremos, xuntos, a primeira ilusión que se cruce no camiño. Anda, Montalbán, que Rijkaard non nos dura dous días e xa vai sendo hora que te decidas. Con Cruyff de nove. Kubala tres metros por tras. Kluivert de regalo a Florentino... E ti no banquillo, corazón. Liga, Copa e Copa de Europa. Non perderemos máis, Manolo.