BEATUS QUI LEGIT / Xesús Alonso Montero
16 jun 2000 . Actualizado a las 07:00 h.A Xunta de Galicia prepara un congreso para estudia-la vida e a obra de Eugenio Montes, escritor galego que faleceu no 1982. Foi un prosista exquisito, culto e sempre con vocación de literato; a súa prosa, coidada e manierista, sobre todo en castelán, non esperta hoxe grandes cobizas entre os lectores pese ó seu encanto lírico. As súas páxinas en galego, en verso e en prosa, foron no seu tempo interesantes. O autor renunciou á lingua galega arredor de 1930 e, pouco despois, ás veleidades socialistas. De novo, foi un pouco bolchevique como se deduce do título da conferencia que pronunciou, en 1921, no Centro Obreiro de Ourense: «La intervención de los intelectuales en la Revolución». Anos despois cualificaría a un paisano noso como «el más grande gallego de todos los tiempos». Non se refería a Pablo Iglesias; referíase a Franco. Desde 1933 _ou algo antes_, Montes é un brillante escritor de pluma falanxista e amigo afervoado de José Antonio, a quen cantou, nun soneto, nestes termos: «Pero viniste tú, en la frente el nido / de Primavera, y levantaron vuelo / del charco estrellas y águilas del lodo». Publicouse na Corona de sonetos... (1939) na que outra brillante pluma falanxista galega, Álvaro Cunqueiro, asevera: «José Antonio, señor, yacen desesperadas / [...] las naves mozas por tu canto armadas». Non sei se Eugenio Montes naceu en 1897 ou en 1900, pero a Xunta, co gallo do seu centenario, prepara un congreso, e temen algúns que, entre os estudiosos, predominen os discípulos de Ricardo de la Cierva e José Luis Varela. A biografía literaria de Montes ten suficiente valía para que o congreso sexa plural, tan plural que non exclúa a estudiosos como Jesús Suevos. Sexa como for, se os organizadores do congreso reeditan algún traballo sobre Montes, hai un que é indispensable: as páxinas que lle dedica Dionisio Ridruejo en Casi unas memorias (Planeta, 1976). Nesas páxinas, Ridruejo caracteriza a Montes, o Montes que serviu a certos poderes, como alguén que «ha deseado vivir libre de cuidados pero no rodeado de honores ni saciado de placeres». Os congresistas meditarán estas palabras e moitos, sen dúbida, matizaranas.