«A vida fóra da política é boa»

Suso Varela Pérez
suso varela LUGO / LA VOZ

VILALBA

ALBERTO LÓPEZ

O deputado vilalbés Eduardo Vidal anuncia a súa retirada e valora o seu paso pola Deputación

15 abr 2019 . Actualizado a las 20:01 h.

Eduardo Vidal Baamonde abandona a primeira liña da política. Anunciouno no último pleno do seu municipio, Vilalba. Militante do PSOE desde o 2004, nestes 15 anos desempeñou cargos e cometidos coa mesma seriedade e rigor que transmite no trato persoal e nos plenos da Deputación como deputado de Turismo.

-Por que deixa a política?

-Chega o momento que hai que coller o camiño de volta. Logo dun traballo intenso no aspecto organizativo e no goberno institucional, hai que regresar á profesión e relaxarse un pouquiño. Chegar á noite e non ter todos os días que pensar qué vai pasar no día de mañá a nivel político... Seguirei preto da política e apoiando aos compañeiros. Ese camiño de volta hai que tomalo algunha vez, e tomeino tras unha longa reflexión e tras deixar as cousas que iniciei consolidadas para que outros podan recoller o relevo, principalmente na agrupación de Vilalba, que está forte e con xente comprometida.

-Tivo máis chamadas estes días?

-E que a xente que me coñece pensa que nin de broma o deixo ou non o acaban de entender. A política rouba tempo que non valoramos porque estamos na inmediatez para dar respostas ás solucións. Agora toca retomar ese momento de refuxio de paz e estar coa familia e os amigos. Hai que pensar que unha vida fóra da política é boa e que a teño que gozar.

-O seu paso pola Deputación acelerou a súa decisión?

-Si desgasta a toma decisións diarias, pero non tivo nada que ver. A candidata en Vilalba, Elba Veleiro, facilitoume a decisión.

-O traballo na Deputación foi o que esperaba?

-É que estes catro anos non foron ao uso. Pasáronse momentos moi duros e malos. O peor foi cando un compañeiro de partido lle dá a presidencia ao PP. Aí pensas moitas cousas, porque acabas de entender que non todo o mundo está en política por uns valores e sentimentos e unha maneira de traballo, senón que cando se meten as relacións persoais neste mundo, bota por terra moitos principios que tiñas. Empezou un mandato convulso e remata asentado, cun presidente da Deputación que fai un bo traballo e que nos obriga a todos a medrar na dificultade.

-Destaca a Darío Campos.

-É que non era o primeiro candidato, pero soubo dar un paso adiante nunhas condicións moi difíciles daqueles días. Foi un argumento de compromiso que descoñeciamos en Darío e sóubonos encamiñar a todos cara a nova situación. Pero non nos enganemos: non pensabamos que fora pasar o que pasou, pero el soubo organizar un goberno e nós participamos na mellor maneira que puidemos e tamén comprometidos con el.

-O seu paso pola área de Turismo.

-Non esperaba que me desen esta responsabilidade. Eu viña de traballar no sector primario, e pasar ao terciario e servizos obrigoume a cambiar as cousas. Empezamos sen nada e fomos creando un equipo e proxectos. Cando cheguei, o señor Armesto deixou a mesa limpa, e nós en catro anos fomos capaces de crear o plan estratéxico, no que participaron más de 200 persoas do sector, e xa fixemos a primeira reunión do Consello Provincial de Turismo. Queda unha base para o que siga con esta delegación.

-O turismo pode ser unha das solucións para a provincia?

-O turismo aguantou a crise e creo que non somos coñecedores das potencialidades que temos. Hai que buscar a autoestima do que temos a nivel de patrimonio material e inmaterial.