Patrimonio dos Ancares denuncia os danos nun xacemento da Fonsagrada
24 sep 2019 . Actualizado a las 19:17 h.O Colectivo Patrimonio dos Ancares veñen de documentar tres novas mámoas, dúas con dolmen (cámara pétrea), nos concellos de Baleira e Cervantes. A de Baleira atópase nos montes do Restelo, nas inmediacións da necrópole megalítica do Alto da Cruz formada por cinco mámoas. Ten unhas medidas de 20 metros de diámetro e unha altura de 1,05 metros. Do cráter de violación asoman dúas pedras da cámara funeraria, sinala Xabier Moure, membro do colectivo patrimonial.
As localizadas en Cervantes sitúanse na Serra de Palmeán. A primeira ten uns 12 metros de diámetro e 0,80 de altura. «Do cono de violación asoman cinco pedras que formaban parte do dolmen, unha delas desprazada; tamén se observan gran cantidade de pedras de lousa e cuarzo que formaban parte da coiraza pétrea que recubrían o túmulo».
A segunda mámoa de Cervantes, no límite entre as parroquias de Quindous e San Pedro, ten un diámetro de 11 metros e unha altura de 0,70. «Tamén posúe cono de violación pero non se distinguen restos de cámara pétrea», explica Moure, quen destaca que a cronoloxía destas novas mámoas sitúase entre o 4000 e o 3000 a. C.
Por outra parte, o colectivo patrimonial denuncia unha nova agresión a unha mámoa no concello da Fonsagrada, no límite con Navia. Trátase do túmulo número 1 da Fonte das Bidueiras «que foi agredido cunha máquina escavadora, producíndolle un gran corte; ademais, sobre a mámoa cravaron un poste de cemento».
O colectivo xa comunicou á Xunta tanto as descubertas como a agresión, para a catologación no caso das primeiras, e para que inicien o expediente sancionador no caso do enterramento da Fonsagrada.
