Xulio Pita Muinelo, concelleiro do grupo mixto en Castro de Rei Son moitos os veciños de Castro de Rei que visitaron nos últimos días a vivenda do novo edil do grupo mixto, Xulio Pita, para apoialo trala decisión de abandonar o BNG polas diferencias que tiña co voceiro, que se fixeron extensivas á UPG. Como home de palabra, cumpriu o seu compromiso, pese a que compañeiros lle deron a espalda trala anunciada demisión. «Aquelo foi unha venda», matizou.
20 jun 2002 . Actualizado a las 07:00 h.O concelleiro Xulio Pita Muinelo pasou a integrar o grupo mixto no Concello de Castro de Rei para intentar, desde a oposición, «recupera-los tres últimos anos perdidos de traballo no BNG». Seguirá traballando na oposición, para conseguir o pobo que os seus veciños lle demandan. O tempo que resta de mandato é suficiente para velos resultados do seu traballo, e calcular as posibilidades de presentar unha candidatura independente, se atopa o respaldo de persoas da súa confianza. -¿Que sucedeu? -Compartía a ilusión do electorado polo traballo feito con anterioridade e que nos valeu o seu respaldo. Perdeuse a credibilidade. Non había diálogo, nin grupo. Un voceiro está para expresar o que sinten todos, non un só. Creo que a UPG ten máis interese por controlar o partido que en traballar polo pobo. -¿Como se sinte? -Decepcionado e defraudado co ocorrido e co comportamento de antigos compañeiros. Os resultados das últimas eleccións municipais foron excepcionais para o BNG, pero o partido non estivo á altura das expectativas que crearon no pobo. Moitos políticos son uns ineptos e outros van o chupe dómine . Creo que a política é unha oficiña de emprego, xa que serve para colocar ós amigos e ós familiares. Os partidos son os grandes caciques da democracia. É un bálsamo que a xente vexa en min unha persoa e non un político. -¿Como influiu na súa decisión a diferencia de criterio no BNG sobre o PAC? -O do PAC foi un roubo para Castro de Rei. Falei de crear un movemento social para consegui-lo apoio da xente a través de firmas, e non houbo vontade. Ninguén quixo comprometerse co pobo para loitar polos problemas dos servicios sanitarios. -¿Cales son as iniciativas que máis interesan ó Concello de Castro de Rei? -Cada concello ten os seus problemas, e non se pode andar presentando unha traca de mocións que son de pouco ou nulo interese para os veciños. Esa traca é un funcionamento piramidal e creo que non se pode gastar en viño o que non tes para pan. O BNG ten que traballar arreo a partires de agora para demostrar que eu era o que molestaba.