José Tomé: «É moi raro que me cabree»

O presidente da Deputación de Lugo ten una viña na Ribeira Sacra na que se relaxa da actividade política


Falo con José Tomé (Guitiriz, 1958) no seu despacho de Lugo, que non é pequeno. Está contento. Tivo en Monforte os mellores resultados da súa vida nas eleccións municipais polo PSOE, tan bos que lle permitiron poñerse á fronte da Deputación de Lugo. Ten xa dous netos que lle fan sorrir e unha viña na que se desestresa. Así que, loxicamente, outra voltiña electoral non lle dá pereza ningunha. Ten o vento a favor.

-Que tal na Deputación? A verdade é que entrou pola porta grande.

-Pois si. Tomei posesión como deputado provincial por primeira vez e aos poucos minutos elixíronme presidente. De momento vai todo moi ben, non teño tempo para aburrirme.

-Outra vez eleccións. Dálle preguiza?

-Prefería que non as houbera, pero se os que teñen que facilitar a formación dun Goberno non o fan pois non queda outra solución. O problema non é votar; os problemas empezan cando non se vota. E os que ocupamos estes cargos, aínda que as campañas supoñen un esforzo, temos que explicarlles aos cidadáns por que estamos onde estamos.

-E se Sánchez tivese pactado con Ciudadanos que lle tería parecido?

-Eu prefería un goberno do PSOE en solitario. Ciudadanos está pactando coa ultradereita.

-Hai uns anos falouse moito da vixencia das deputacións. Superamos o debate?

-Foi un debate inventado. Hai que ir mellorando as Administracións, pero coa despoboación do rural hai moitos concellos que serían inviables sen un órgano como a Deputación.

-Agora viaxará máis. Ten coche o cargo de presidente?

-Si. Sempre viaxei moito. Cando estaba na executiva de UXT viaxaba todos os días a Santiago, e logo cando fun deputado tamén. E sendo alcalde, porque sentado no despacho non se arranxan as cousas.

-Se ten chofer non lle poñerán multas.

-A min non me gusta correr. O que hai é que saír cedo. No coche non vou mirando a paisaxe: vou traballando seguido. É unha continuación do despacho.

-Tanta viaxe, despacho... Como se desestresa? Fai deporte?

-Para o deporte non teño tempo. A verdade é que non son moi deportista. Pero tamén é certo que non me estreso moito. Son unha persoa tranquila, é moi raro que me cabree. Teño unha pequena viña na ribeira de Chantada e gústame ir alí. Iso si que me relaxa moito.

-Trabállaa vostede?

-Si, si. É un terreo pequeno; tres ferrados máis ou menos.

-Canto produce?

-Pouco. Podo moi curto para que non dea moito. Entre mil e mil cincocentas botellas, segundo o ano. É para autoconsumo, para os amigos e para facermos unha churrascada.

-Envioulle algunha a Pedro Sánchez?

-Non. Eu nin sequera etiqueto. Non as podo mandar.

-Que é o que menos lle gusta da política?

-Os inventos e as mentiras. Cando criticas honestamente estás a facer o labor de oposición, que é lexítimo. Pero cando algún se dedica a enganar a xente a min cáeme moi mal.

-Cando era pequeno, que quería ser de maior?

-Pois nin me acordo.

-Non quería ser bombeiro ou futbolista...?

-De pequeno gustábame moito o fútbol, e a xente de Guitiriz sempre tirou moito para A Coruña. Eu tiña familia alí, e ía ver o Deportivo cando aínda había que sentarse no cemento. Eu recordo ver o Deportivo en Terceira División xogando contra o Gran Peña, por exemplo.

-Xa podo aforrar logo a pregunta de «Celta ou Dépor?».

-Si. Totalmente do Dépor.

-Vai subir?

-Pois tal e como empezou teno complicado. Pero ao que temos que salvar é ao Lugo.

-Explique a provincia de Lugo en poucas palabras.

-É a provincia máis rica en diversidade. Ten unha costa moi bonita, coa praia das Catedrais; toda a chaira de Lugo, que é das zonas de maior produción de leite do Estado; o contorno da capital; a montaña dos Ancares e O Courel, espectacular, e logo temos...

-A xoia...

-O val de Lemos como capital da Ribeira Sacra.

-Agora fale de vostede con poucas palabras.

-Son traballador e con conviccións firmes. E tamén son leal.

-Xa ten netos, non?

-Dous. Ser avó é un grao, e os netos valen un imperio.

-Invítano a cear a mesma noite Cayetana Álvarez de Toledo, Leo Messi, Pilar Rubio e Pérez-Reverte. Con quen vai?

-Con Cayetana non. Messi é moi aburrido, e Pérez-Reverte.... Quizais con Pilar Rubio, que é máis guapa ca os outros tres.

-Arrepíntese de algo?

-Non. Conscientemente non fixen dano a ninguén. O resto son cousas da vida.

-É escravo do móbil?

-Un pouco si, pero tamén axuda moito.

-Cal é o seu lugar favorito?

-A miña bodega.

-Dígame unha canción.

-O carro, de Fuxan os Ventos [e cántaa].

-Que é o máis importante na vida?

-A felicidade.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

José Tomé: «É moi raro que me cabree»