«A luz e as cores de Monforte son algo moi íntimo para min»

Afincada en Eivissa, Caíca Sogo presenta por primeira vez as súas obras na súa cidade natal


monforte / la voz

A Casa de Cultura monfortina acolle ata o 13 de xaneiro a exposición Luces de fóra a dentro, da artista monfortina Caíca Sogo. Afincada desde hai dúas décadas en Eivissa, onde traballa como profesora de matemáticas, ten mostrado as súas obras en varias exposicións colectivas e individuais. Esta é a primeira vez que expón na súa cidade natal.

-¿Canto tempo leva dedicándose á pintura?

-Comecei a pintar con cores en torno ao 2014. Antes facía debuxos ao carbón. A miña formación é matemática, non artística, pero sempre tiven a necesidade de facer cousas creativas. Xa levo un tempo facendo exposicións, pero ata agora non puiden traer ningunha a Monforte porque transportar todos estes cadros desde Eivissa é moi complicado.

-Na súa exposición hai moitas paisaxes, pero tamén outras obras de temáticas moi variadas.

-A exposición reúne máis ou menos a metade de toda a miña obra e mostra as diferentes temáticas nas que traballo. Hai pinturas representativas de todas as etapas polas que fun pasando. Comecei con pinturas de tema familiar e despois pasei a pintar paisaxes, pero tamén outras cousas moi diferentes. Ultimamente estou explorando a pintura abstracta e na exposición hai tamén algunhas mostras desta etapa.

-¿Que influencia teñen nas súas paisaxes os lugares onde viviu?

-Teñen unha influencia moi importante. Gústanme moito a luz de Eivissa e as cores características do Mediterráneo, que son moi diferentes das do Atlántico, e pintei cadros inspirados nesas paisaxes. Pero interésanme tamén as luces e as cores do outono de Galicia. Sobre todo as de Monforte, que para min son algo moi íntimo porque me recordan a miña infancia e a miña mocidade. Levo moitos anos fóra, pero sempre fun e sempre serei de Monforte. Para as paisaxes monfortinas inspireime en fotografías de Miki Fernández, un fotógrafo que ten imaxes marabillosas.

-Algunhas das súas pinturas inclúen textos e números.

-Pintei varios cadros que son como unha homenaxe ao meu avó e reproducín uns apuntamentos que el fixo cando estudaba matemáticas por correspondencia mentres facía o servizo militar. Tiña unha caligrafía preciosa, moi típica daqueles tempos, que é unha obra de arte en si mesma. Tamén teño obras baseadas nas matemáticas e nas figuras xeométricas. É unha influencia da miña especialidade profesional e tamén da miña familia, porque a maioría dos meus familiares estudaron ciencias.

-Unha das súas paisaxes monfortinas tamén contén frases escritas. ¿De onde proceden?

-Son textos extraídos de varios poemas de Lois Pereiro. É unha paisaxe con néboa, que me parece máis adecuada para combinar coa poesía de Pereiro, que ten como unha tonalidade escura.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«A luz e as cores de Monforte son algo moi íntimo para min»