A sociedade de caza Val de Lemos organiza un curso formativo sobre a nova normativa para batidas
10 jul 2014 . Actualizado a las 07:00 h.Manuel Casares está convencido de que a maior parte dos cazadores aínda non coñece as esixencias da normativa legal que regula as batidas desde o ano pasado. Por iso a sociedade Val de Lemos, que el preside, lle pediu á Federación Galega de Caza que organizase en Monforte unha xornada formativa sobre seguridade. Celebrarase o sábado na antiga escola de capacitación agraria. Poderán asistir ata cen persoas, pero é preciso apuntase antes de mañá.
-¿Canto tempo leva a nova normativa en vigor?
-Está vixente desde o ano pasado.
-¿E os cazadores aínda non a coñecen?
-Eu diría que non.
-¿As normas novas son moi distintas ás anteriores?
-Cambian cousas, si. A xente non coñecen as obrigacións que ten, e despois veñen os problemas. Os cambios afectan a todos os que participen en batidas e moi especialmente aos que actúen como xefe da batida. Asumen máis responsabilidades que antes. En realidade o cambio fundamental é que agora as normas son máis ríxidas, máis esixentes. Por exemplo, agora é obrigatorio levar chaleco reflectante, algo que antes era optativo. Tamén hai que ser estricto cos postos fixos, ninguén se pode mover, e coa distribución dos xefes de batida, coas distancias a núcleos e a estradas... Moitas normas xa existían antes, pero en xeral agora aparecen na lei dunha maneira más clara. As sancións tamén son máis estritas. A xente tense que acabar de convencer de que na caza maior non se pode andar xogando, porque despois chegan os accidentes.
-A Administración está aplicando con rigor esta nova regulamentación?
-A verdade é que non. A Administración estivo ata agora máis ben informando, tratando de facerlle ver á xente como hai que facer agora as cousas.
-¿Se a Xunta se puxese a aplicalo xa de forma rigorosa habería moitas multas?
-Si.
-¿Para todos?
-Se se aplicase a norma con rigor, caeríamos todos, e eu inclúome. Temos que admitir que neste momento non hai quen cumpra a normativa ao 100%. Precisamente por isto quixemos na sociedade Val de Lemos que se celebrase aquí un curso para os cazadores, para que todo o mundo teña claro que é o que se pode facer e que cousas xa non van ser posibles. En realidade, se comparamos o conxunto de normas que regulan as batidas coas existentes por exemplo en materia de tráfico ou de sinistralidade laboral, as cinexéticas son moi pouca cousa. Pero temos que reducir todo o que se poida o perigo de accidente, de mortes.
-¿Son os cazadores máis refractarios que outros colectivos a cumprir as normas?
-Non, o que pasa é que ata agora estabamos un pouco deixados de lado. É certo que non por descoñecer a lei estás libre de cumprila, pero tamén é verdade que moitas veces mentres non pasa nada pásase un pouco. O problema chega cando pasa algo. E hai que dicir tamén que ata agora había moita desinformación. Cursos como o desta fin de semana pretenden explicar como teñen que comportarse os cazadores, que hai que levar, as distancias mínimas, os tipos de armas... A xente non pode pensar que para saír ao monte chega con coller a arma e listo. Hai que cumpir as normas, pero non polos que as dictan, senón por nós mesmos.
manuel casares cazador