Carballal é un dos lugares que conservan a tradición panadeira rural
11 jun 2011 . Actualizado a las 06:00 h.A elaboración del pan no forno doméstico, unha prática habitual ata non hai moitos anos, está a volverse cada vez máis infrecuente debido ao despoboamento do medio rural galego. O forte retroceso demográfico que padecen zonas como a Serra do Courel está provocando a desaparición dos labores tradicionais relacionados co pan, que comprenden a sementeira do cereal, a sega e a recolleita, a moenda, o amasado e a cocción no forno de leña. Ao mesmo tempo caen no abandono moitos antigos fornos de grande valor etnográfico.
A pesar de todo, no Courel hai fogares que se resisten a abandonar esta tradición secular. Un deles é á chamada Casa do Carrozo, propiedade de Arsenio Fernández e a súa familia, na localidade de Carballal, pertencente á parroquia de Vilamor. Unha vez por mes elaboran pan e empanadas nun forno centenario ubicado nunha antiga construción separada da vivenda.
Cando se fan estas fornadas, o labor mantén ocupada á familia unha boa parte do día. Primeiramente hai que quentar ben o forno a base de xestas, toxos e leña seca. Conseguir a temperatura axeitada leva pouco máis dunha hora. Máis laboriosa resulta a preparación da masa de fariña na artesa, agregándolle auga temperada e levadura. Este proceso leva normalmente o mesmo tempo que se precisa para aquecer o forno, cuxo calor axuda a levedar a masa.
Últimos pasos
Consideráse que o forno ten a temperatura idónea cando as súas paredes se poñen brancas. Entón várrese o seu interior cunha varredoira feita de xestas verdes. Despois, a medida que a masa vai levedando, cóllense as cantidades necesarias para o tipo e o tamaño do pan que se quere elaborar. A base da pá empóase con fariña para que a masa non se pegue e seguidamente introdúcese no forno.
O tempo de cocción depende de cantidade de pan enfornado e da leña que se empregue para quentalo. Na fornada que recollen as imaxes da dereita cocéronse dezoito bolos de pan de dúas empanadas -unha de carne e outra de patacas, chourizo, panceta e cebola- e o proceso durou arredor de noventa minutos.