O PP do Courel tilda de mentirosas a todas as partes implicadas na polémica apertura da ferrería de Seoane
17 jul 2008 . Actualizado a las 02:00 h.A ferrería de Seoane foi levantada no século XIX á beira do río Lor. En 1999, durante o goberno de Fraga, foi restaurada pola Consellería de Cultura. Trala renovación xurdiron as discrepancias entre a Xunta e os donos do edificio, que se negaron a abrilo ao público alegando que carecía de suficientes medidas de seguridade.
Pouco tempo antes das últimas eleccións autonómicas, en abril de 2005, a Administración anunciou que compraría o edificio da ferrería para transformalo nun museo etnográfico dedicado á cultura tradicional da zona. Pero co cambio de goberno os propietarios da ferrería non volveron saber máis nada do tema e a polémica continúa aberta.
O PP do Courel acusa, a través dun comunicado, aos donos da ferrería de mentir cando din que a Consellería de Cultura rehabilitou o edificio co fin de que pasase a mans da Administración. Segundo os populares «a Consellería fixo unha inversión en base a un convenio no que os propietarios se comprometían a que unha vez rehabilitada a abrisen ao público para poder ser visitada».
Os populares culpan ao actual alcalde do Courel, Xosé López Fontal, de forzar á Xunta a que compre as instalacións, ao non conceder a licenza municipal aos propietarios para a apertura ao público, ao tempo que denuncian «a falta de interese mostrado ultimamente por parte do actual goberno da Xunta».
Pola súa banda, a Administración considera que non se formulou ningún acordo, polo que o actual Goberno non está obrigado legalmente neste terreo.
As discrepancias entre os donos do inmoble e a Xunta impediron o aproveitamento turístico da ferrería de Seoane, que entrou en decadencia a finais do século XIX como todas as fábricas siderúrxicas artesanais da montaña lucense. A edificación, na que se transformaba en metal o mineral de ferro extraído dos xacementos da zona, tamén albergou unha serraría e unha pequena central hidroeléctrica.