As candidaturas para dirixir o PP monfortino poderán presentarse ata 48 horas antes do congreso
LEMOS
A xestora que está á fronte da agrupación do Partido Popular de Monforte informou onte que as candidaturas que aspiren a dirixir o partido poderán presentarse ata 48 horas antes do inicio do congreso local, que terá lugar o próximo 15 de decembro. O prazo que finalizará o próximo venres, indicaron, corresponde exclusivamente á presentación de solicitudes para poder acudir como compromisarios.
No congreso poderán participar un total de douscentos compromisarios, cifra que está por debaixo do número de militantes que ten a agrupación local do partido. Por este motivo, no caso de que o número de aspirantes sexa superior ao de prazas procederase á súa elección mediante lista aberta, segundo contempla a convocatoria formulada pola dirección provincial. As peticións para acudir ao congreso como compromisarios pódense formular na sede do PP de Monforte ata o venres, de 21.00 a 22.00 horas.
Convocatoria en prazo
Na xestora indicaron ademais que a convocatoria do congreso está en prazo e forma e que se algúns militantes non recibiron aínda a carta remitida polo presidente provincial notificando as datas para o proceso de renovación da executiva local «é cousa de Correos».
A misiva asinada por José Manuel Barreiro ten data do 15 de novembro e comezou a chegar aos afiliados populares de Monforte o pasado luns.