A TRIBUNA | O |
24 nov 2003 . Actualizado a las 06:00 h.MONFORTE MORRERÁ lentamente. Este tétrico vaticinio, que parece saído do antigo oráculo de Delfos ou dos labios da profetisa Casandra, acaba de ser pronunciado polo dirixente socialista lucense Ricardo Varela. Engadindo -maticemos- que isto sucederá, ao seu parecer, se non se constrúe a autovía de Monforte a Nadela e se a estrada N-120 non se transforma en autovía. Home, iso de morrer, o que se di morrer, se cadra semella un tanto esaxerado. Pero o certo é que actualmente -e xa desde hai moitos anos- Monforte non parece gozar de boa saúde no plano económico e laboral. A situación no resto do sur lucense tampouco está como para botar foguetes. Segundo as cifras máis recentes das oficinas de emprego, en Monforte e Chantada hai agora 136 parados máis que hai un mes. O curioso é que datos como estes saen a relucir ó mesmo tempo que se anuncia que a economía segue medrando no conxunto do Estado, ata o punto de que o Goberno central estudia solicitar a incorporación de España ao G-8. A cuestión é saber se bastará con aumentar a anchura das estradas para que o sur lucense se enganche por fin a ese brillante crecemento económico.