A Universidade de Vigo convoca o premio Xosé Luis Franco para os mellores traballos de investigación xurídica en galego
GALICIA
Poden presentarse ao certame estudantes de calquera grao ou mestrado que estivesen matriculados entre os cursos 2022-2023 e 2024-2025. O prazo remata o día 25 de abril e o premio ascende a 500 euros
08 abr 2025 . Actualizado a las 17:11 h.A Facultade de Ciencias Xurídicas e do Traballo da Universidade de Vigo abriu xa a convocatoria para presentar candidaturas ao Premio de Investigación Xurídica en Lingua Galega Xosé Luis Franco. O certame, que xa vai pola súa cuarta edición, busca fomentar o uso da lingua galega no eido xurídico, poñendo en valor os traballos de investigación realizados nesta área que estean elaborados en galego.
Logo de que a Universidade ampliara o prazo, as persoas interesadas en participar no certame poden presentar os seus traballos ata o vindeiro 25 de abril. Deben ser orixinais e poderán tratar calquera tema do ámbito xurídico nas súas diferentes formas, sempre en lingua galega. O premio conta con dúas modalidades. Por unha banda, poden presentar candidaturas á modalidade A os estudantes matriculados en calquera grao ou mestrado en Galicia. Por outra, o alumnado da Facultade de Ciencias Xurídicas e do Traballo da Universidade de Vigo pode candidatarse á modalidade B.
Sexa para unha modalidade ou para outra, á presente convocatoria poderán concorrer as persoas que estivesen matriculadas, en calquera universidade española, entre os cursos 2022-2023 e 2024-2025. A outra condición importante é que os traballos deben realizarse de xeito individual e só se acepta unha candidatura por persoa.
Unha vez recibidas as propostas, o encargado de decidir os gañadores será un xurado integrado polo decano da Facultade de Ciencias Xurídicas e do Traballo, o coordinador de Normalización Lingüística do centro e tres membros do persoal da facultade. A resolución chegará en maio, no acto que a universidade celebrará co gallo do día das letras galegas. E os premios estarán dotados cun dipoma acredidativo e cunha remuneración económica de 500 euros para cada modalidade.
A Universidade de Vigo destaca a boa acollida que recibiu o certame na súa pasada edición. Presentáronse a ela unha vintena de traballos, entre os que saíron catro gañadores que trataban temas diversos, dende a liberdade postpenitenciaria ata a ocupación de inmobles, pasando pola ocupación de inmobles, a crise dos pellets ou os usos da intelixencia artificial no dereito español.
Con este galardón, a universidade viguesa pretende tamén reivindicar a figura de Xosé Luis Franco Grande, avogado e tamén poeta, tradutor e lexicógrafo. Autor de máis dunha ducia de libros e dicionarios, recibiu o premio Nacional de Poesía Rosalía de Castro polo seu libro «Entre si e o non». Foi académico de número da RAG e exerceu, ata a súa morte no 2020, como colaborador de La Voz de Galicia.