Orzamentos 2020: As contas da resignación


Unha palabra define os orzamentos da Xunta para 2020: resignación. Resignación ante a desaceleración da economía, porque un orzamento que medra o mesmo que o PIB nominal supón renunciar a desenvolver unha política fiscal expansiva para impulsar o crecemento para conxurar o perigo da volta á recesión.

Resignación ante a crise industrial que azouta o noso país, porque a Xunta non inclúe nin unha soa medida para actuar contra a ameaza real de desertización industrial de Galicia, en especial dalgunhas comarcas.

Resignación ante o deterioro na calidade dos servizos públicos, nas prestacións sociais e na modernización da economía, os sectores produtivos e as infraestruturas despois de dez anos de austeridade, que tampouco en 2020 se van empezar a recuperar.

Fronte á propaganda, a realidade: descontada a inflación, o orzamento real está 2.000 millóns de euros por debaixo de cando empezaron os recortes. Non é certo que o gasto social vaia ser o máis alto da historia: reduciuse en 1.100 millóns, en termos reais, e máis do 80 % foron recortes en sanidade, educación e emprego.

Resignación que ten a súa orixe no fundamentalismo neoliberal: a obsesión por reducir o peso do público na economía. En 2009, o gasto non financeiro equivalía ao 18,4 % do PIB; en 2020, a penas chegará ao 15 %. Son 2.400 millóns menos, cifra que cuantifica o brutal axuste no gasto durante a presidencia de Feijoo.

Porque non é un problema de falta de ingresos, senón de ideoloxía, como o vén a demostrar o anuncio de que unha persoa que reciba unha herdanza de 2 millóns de euros (en dous procesos, en gananciais) vai pagar o mesmo que unha que reciba 20.000 euros. Para o PP sempre hai marxe para os regalos fiscais aos máis ricos, aínda que o pague a maioría social con recortes e débeda.

Fronte á resignación, á falta de ideas, á ausencia de medidas para enfrontarse á desaceleración, a sociedade galega precisa un orzamento diferente que dea resposta ás súas preocupacións: emprego, precariedade, crise industrial e servizos públicos.

Por MANUEL LAGO Voceiro do Grupo Común da Esquerda

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Orzamentos 2020: As contas da resignación