A promesa de Rajoy de 4.000 millóns de euros para Cataluña soa a dúas cousas: a tentar solucionar un problema político co diñeiro público e ao habitual desprezo con que o Partido Popular practica a súa política para Galicia. Soa a debilidade de Feijoo diante dos seus maiores.
Tentar seducir a Cataluña cun cheque é a demostración de como entende a acción política o Partido Popular: envía o diñeiro a Cataluña e deixa a Núñez Feijoo no lugar que lle corresponde. No de obedecer.
O investimento en comunicacións ferroviarias de proximidade, que En Marea non deixa de propoñer para Galicia, explica que Rajoy ningunea aos seus votantes e ningunea a Feijoo mentres converte os votos dos galegos en investimentos para outros.
Mentres asegura que non hai diñeiro para nada do público, Rajoy encontra un extintor económico para tentar, tarde e mal, apagar o incendio que el mesmo provocou. Rajoy, como Feijoo, é constante niso: en que Galicia e os galegos saian sempre mal parados de todas as súas decisións.