O Céltiga agarda poder sacar mañá ante o Estradense o mal sabor de boca co Compos
FUTBOL GALLEGO
Os de Luis Carro xogarán este mércores na casa o resto do partido adiado o sábado 7 por un dos temporais de chuvia
17 feb 2026 . Actualizado a las 05:00 h.«Contento, porque dimos un moi bo nivel nun escenario difícil, difícil, o máis complicado da Liga, con opcións de ter gañado. E amolado, por non ter sumado un punto que merecemos». O adestrador do Céltiga, Luis Carro, continuaba onte rumiando o mal sabor de boca que a derrota por 2-1 no terreo de xogo do líder, Compos, deixou no vestiario do conxunto arousán. Un duelo que, analiza, caeu do lado do xigante «polo diferencial de calidade, e polos trocos, que lle dan a eles maior frescura e nivel». A oportunidade fallada por Óscar de subir o 1-2 no marcador, mandando fóra un balón que «só tiña que empurrar á portería», di o seu técnico, puxo o chisco de sorte que tantas veces decanta os partidos, desta volta á contra.
Así as cousas, sen tempo de recuperación nin de cavilar máis sobre o último partido, o Céltiga recibirá este mércores, desde as 19.30, a un rival directo por tentar facerse cunha praza na vindeira promoción de ascenso. O Estradense, gañador de dous dos seus tres últimos partidos e tras catro semanas invito, virá xogar á Illa os 76 minutos restantes do partido adiado o día 7 pola auga.