Memoria republicana

«Morrerei outro día», vibrante novela de Isabelle Alonso, beirea o xénero da biografía ficcional e lévanos, dende a reivindicación, da inocencia á madurez


«As palabras serven para todo. Se sabemos usalas, todos temos unha mina de ouro na boca», di o protagonista desta vibrante novela da escritora francesa Isabelle Alonso e traducida con excelencia por Isabel Soto e Xabier Ron. Probablemente son esas as palabras que lle permitirán salvarse e morrer outro día.

Hai tres focos de interese, cando menos, nesta proposta que beirea en ocasións o xénero da biografía ficcional. O primeiro abrangue o período histórico que o protagonista, Ángel Alcalá, un alter-ego de Vicente Alonso, pai da escritora, relata desde o seu nacemento en Valencia ata o ano 1939, cando se encontra no campo de concentración de Saint-Cyprien, territorio da ignonimia que tamén transitaron Lorenzo Varela ou Rafael Dieste. Todos os acontecementos pasan polos seus ollos: desde os da descuberta do mundo ata aqueles que o levan a alistarse como voluntario na contenda civil e a retirada a Francia, onde a visión das maletas abandonadas nas gabias é unha metáfora imborrable que todo o explica.

O segundo núcleo orbita arredor da formación do protagonista. Velaí as epifánicas páxinas dedicadas á descuberta da lectura ou á ledicia fraternal vivida na proclamación da II República, con momentos frustrantes nalgúns casos, felices noutros. Ángel é un neno precoz, aleuto e curioso en quen todo sedimenta, de arraigadas conviccións contaxiadas desde o seu berce polos seus pais, entusiastas cultivadores das ideas igualitarias e progresistas. Asemade, irá axustando o zoom da súa ollada: desde a inocencia inicial con que se ve todo, impulsado polos valores da solidariedade, ata a súbita madurez que as duras vivencias imprimen no seu carácter.

E o terceiro foco céntrase na reivindicación tanto da importancia da cultura para salvarse como da memoria dos vencidos, do trauma moral e lacerante que significou a guerra, na que sempre había inimigos nos dous bandos. Inesquecible.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Memoria republicana