A praza do Humor

Siro xa quixo converter A Coruña na capital mundial do humor nos noventa... Aquí un recordo daquel momento, unha homenaxe a Castelao, Cunqueiro, Wenceslao, Risco e Camba, e moito futuro para a Praza do Humor


A idea de converter A Coruña na Capital Mundial do Humor é excelente. Eu quíxeno facer, ao meu xeito, no ano 1990, ao deseñar a praza do Humor, unha homenaxe aos grandes humoristas do mundo desde Galicia, onde o sentido do humor é parte esencial da nosa personalidade, e desde A Coruña, unha cidade que ri. A idea, o proxecto e a realización da obra foron bos, pero non se lle recoñeceron a orixinalidade nin o valor artístico, e non tivo a atención debida por ningún goberno municipal.

Conste que a acollida foi extraordinaria. O alcalde Paco Vázquez inaugurouna a noite do 7 de xuño, ante varios centos de persoas, cun discurso en galego moi divertido, e eu intervín para dicir que aquela praza tiña que ser «a do bo humor». Parecía que iamos conseguilo porque se creou a Asociación de Veciños Praza do Humor e a todas horas había xente fotografándose, cun sorriso nos beizos, con Castelao, Cunqueiro, Wenceslao, Risco, Camba e demais mestres do humor debuxados no chan. Luis Carandell veuna visitar e falou dela eloxiosamente en El País e despois no libro Diccionario de la Españología. Chumy Chúmez visitouna comigo e, ante o abandono dos servizos municipais, bromeou e preguntoume se non poderiamos desmontala e levala a Madrid, onde el se encargaría de que fose atendida e homenaxeada. Chumy, coma Forges, si valoraba o proxecto e a realización da obra polos escultores Ferreiro Badía, Xosé Castiñeiras, Francisco Escudero e Ramón Conde; e ambos sabían que a praza do Humor, ademais de ser un recinto urbano único no mundo, é irrepetible porque non crían que no mundo exista outro escultor que poida reproducir os meus debuxos en grandes placas de mármore e percorrelos coa broca dun trade, facendo un canal de 6 milímetros de ancho e 6 de profundidade, para enchelo de poliéster negro. Tampouco eu creo que haxa en ningures outro Xosé Castiñeiras que poida repetir tal fazaña artística.

Luis Piedrahita e demais mozos humoristas que farán da Coruña a Capital Mundial do Humor valoran a praza do Humor, e vana salvar. Seino.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos
Comentarios

A praza do Humor