Lennon, Valle-Inclán e as máscaras de ficción

Ramón Nicolás

FUGAS

Cando John Lennon coñeceu a Valle-Inclán

11 ago 2017 . Actualizado a las 15:38 h.

A profesora e escritora coruñesa Beatriz Maceda Abeleira, estrea unha nova colección na Editorial Trifolium que, baixo o epígrafe de Nemo, acolle o que é o primeiro libro integrado nunha serie orientada a un público xuvenil. Sendo así, con todo, Maceda consegue unha obra que me atrevería a situar dentro desa narrativa de fronteira, apta para quen queira gozar dunha boa e sólida historia.

Nela formúlase unha hipótese máxica que se sitúa, en canto ao tempo histórico, aos cinco meses despois do asasinato de John Lennon, pero ademais trázase unha liña transversal que une dúas épocas, sempre a través dun bisneto ficticio de Valle Inclán, como son as que lle tocou vivir ao seu bisavó -os días turbulentos que reflectiron as voces da xeración do 98- e a explosión creativa que chegou nos anos oitenta do pasado século.

En boa medida, esta proposta encaixa, nas chamadas novelas de aprendizaxe pois nestas páxinas o bisneto deixa a adolescencia e asómase, así, a un mundo de adultos onde non é menor a relevancia que ocupa a necesaria descuberta dalgúns enigmas de carácter familiar e persoal que debe solventar por si mesmo para entender a vida doutro xeito.