«Non me acordo de nada de como foi o accidente»

O edil e exalcalde Xabier Míguez retomou esta semana o seu traballo despois de catorce meses de baixa tras unha caída en bici


vilaboa / la voz

Míguez foi alcalde de Vilaboa e na actualidade é edil do BNG e presidente dos comuneiros da súa parroquia. Sufriu un aparatoso accidente en setembro do ano pasado que o alonxou da vida pública ata que este mes recibiu a alta, reincorporouse ao seu traballo e concedeu a súa primeira entrevista.

-¿Como se atopa?

-Atópome moi ben. Estou xa de alta e hoxe [por onte] vin a Oseira nunha excursión do instituto. Atópome divinamente.

-¿Está xa totalmente reintegrado no seu traballo?

-Si, si, no instituto Mendiño de Redondela.

-¿Como é volver ao traballo tras tantos meses fora?

-Atópome moi ben porque os compañeiros e a directiva mantiveron perfectamente o carácter do instituto.

-Agora que xa está de alta, ¿manterá o seu posto no Concello? ¿Irá ao próximo pleno?

-Si, claro, vou a asistir.

-¿E que recorda do accidente da caída da bicicleta? ¿Como foi?

-Non o sei, non me acordo de nada, do accidente non me acordo de nada.

-¿Nin de como caeu?

-Non, de nada.

-¿Como pasou estes longos meses de recuperación?

-Estiven de baixa desde setembro do ano pasado, catorce meses ata agora. E sentinme moi ben, porque a evolución foi moi boa e sempre notaba melloras, continuamente.

-¿Sentiuse arroupado polos seus veciños e compañeiros?

-A xente foi estupenda. Tratáronme marabillosamente ben os políticos e os veciños.

-¿Que foi o máis difícil neste proceso de recuperación?

-Non lembro nada difícil. Todo foi fluíndo moi ben.

-¿Síntese capacitado para a súa responsabilidade no goberno de Vilaboa na actualidade?

-Si, si.

-Durante a súa comparecencia negociouse con Defensa polos terreos da Brilat. ¿Cal foi o resultado segundo vostede?

-Moi ben e someteremos o acordo á asemblea a ver que pensan os comuneiros.

-¿Pensou en dimitir?

-Non, non pensei niso. Esperaba a que pasase o tempo, a que curase e a reincorporarme.

-¿Que tal foi o comportamento dos seus compañeiros?

-Son excelentes, a tenente de alcalde, Ornela Fernández, e os concelleiros Cándido Rosendo, Canducho, e Tomás Boullosa.

-No pasado o alcalde, o socialista José Luis Poceiro, e vostede tiveron moitos choques, ¿como son as relacións agora?

-Boas.

-Se ten a oportunidade, ¿volvería a figurar na candidatura do BNG?

-Estou ao servizo para que Ornela Fernández sexa a próxima alcaldesa de Vilaboa. Se o partido e ela consideran oportuna a miña presenza, sempre estou á súa disposición.

-¿Que aportou vostede á política de Vilaboa?

-Traballo, ideas e traballo para levalos a cabo.

-¿De que se sinte máis orgulloso da súa etapa como alcalde de Vilaboa?

-O centro de saúde, a obra das Salinas e o trato cos veciños.

-¿E cambiaría algo se puidese daquela época?

-Non.

xabier míguez concelleiro do bng en vilaboa

«Nunca pensei en dimitir, so esperaba a que pasase o tempo e reincorporarme»

«A negociación da Brilat foi ben e someteremos o acordo aos veciños»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«Non me acordo de nada de como foi o accidente»